رسالة ترحيب " قرآن كريم "





















أعوذ بالله من الشيطان الرجيم



بسم الله الرحمن الرحيم

" أ ل ر 0 تلك آيات الكتاب المبين 0


إنا أنزلنه قرآناعربيا لعلكم تعقلون 0

نحن نقص عليك أحسن القصص بما أوحينا

إليك هذا القرءان وإن كنت من قبله لمن الغافلين "

صدق الله العظيم ( سورة يوسف )































الثلاثاء، 11 مايو 2010

حكايات عمو فاروق "الجزء الأول" دودة القطن بستة صاغ


 ----{  دودة  القطن  بستة  صاغ }----
**********************************************
سنة 1959  وأنا سنى إتناشر سنة كنت  فى مدرسة المعارف الإعدادية وكنت أنا وأخويا الصغير"محمود" أصغر منى بسنتين  بنحب تربية الحمام وكان ابونا  يكره الموضوع ده أوى  ويضربنا عايزنا  ندبح الحمام  وماكانش عايز يدينا فلوس عشان  نشترى للحمام الحبوب ( ذرة - قمح - فول ) وكنا نقول له إحنا عايزين نربى الحمام لأننا بنحبه وممكن نصرف عليه من جيبنا فكان يضحك بسخرية ويقول لنا منين فقلنا له حاتشوف طبعا ماقدرناش نقوله إزاى لأنه لو عرف حايدبحنا مدرس لغة عربية ودين الشيخ الأزهرى ولاده يشتغلوا عمال يلموا "الدودة" ( قصدى دودة القطن كان  إسمها كده عند الأولاد ) ورحت  أنا ومحمود إلى "الخولى" ( رئيس العمال ) مع واد صاحبنا إسمه " مصطفى " بيشتغل  عنده إلى الغيط اللى عليه الدور "بالنقاوة" وسجلت إسمى أنا ومحمود بعد المغرب وقالنا: تيجوا بكرة الساعة سابعة  الصبح واللى يتأخر حاشطب إسمه ورجعنا البيت فرحانين موش عرفين ننام بنحلم بالفلوس والمفروض ننام بدرى عشان نصحى بدرى والنوم طار من عينينا وقولنا لمامتنا :صحينا بدرى ستة ونص قالتلنا : ليه رايحين فين ؟ قلنالها حانشتغل بالدودة عشان نشترى أكل للحمام قالت : دالو أبوكو عرف حايموتكوا قولنالها: معلش ياماما ماتقولولهوش والنبى وأمنا كانت حنينة أوى وخايفة علينا ومحتارة تعمل إيه بس فى الآخر وافقت وقالت : ربنا يستر ومايعرفش والساعة ستة ونص لقينا مامتنا بتصحينا روحنا غسلنا وشنا بسرعة ولبسنا الجلابية ( لأننا بنام بالبيجامة والشغل عايز تلبسله جلابية لازم ) وكان صديقنا "مصطفى " مستنينا وروحنا للغيط وبدا الخولى يوزعنا كل واحد قدام خط زراعة وقالنا : كل واحد منكوا يقلب ورق "السجرة"  ( الشجرة)  واللى يلاقى فيها "لطعة " يقطعها ويحطها فى "عبه " بصيت لصاحبى "أنا وأخويا محمود" وقولتله إيه "اللطعة" دية قالى هيه دودة القطن بايضة وحاطه بيضها حوالينه خيوط زى العنكبوت على الورقة من تحت عشان تحميها من الشمس ووريهالنا على" سجرة القطن "  وقولتله وإيه هو " عبه " قالنا ترفع جلابيتك لغاية وسطك وتربطها ما الجنب فتعمل "عب" يعنى زى الجيب .  وأى واحد منكم ينسى" لطعة" حاخرب بيته إلتفتنا لقينا الخولى هوه اللى بيتكلم وقال: كل واحد منكوا وراه واحد يفتش عليه يعمل "شيشن" اللى يلاقى وراه "لطعة" حاخصم منه نص اليومية قولنا لصديقنا : هيه اليومية كام ؟ قالنا : ستة ساغ قلت داحنا حانبقى أغنيا  يامحمود فضحك من قلبه وهوه فعلا فرحان وبدأنا العمل وكل سجره أقلب ورقها مالاقيش تحتها حاجة لغاية ماقرب الخط ينتهى لاقيت " لطعة" فرحت بيها وقطعت الورقة وحطيتها بعبى ولقيت واحد ورايا بيقولى : أنت سيبت " اللطعة " دية وموش حاقول للخولى بس دى آخر مرة  , قولتله :شكرا ياأخ إسمك إيه ؟
قالى : " منخر" قولتله : ساكن فين "يامنخر "  قالى : فى عزبة الملك قولتله : داحنا جيران بقى فين من عزبة الملك قالى : عند برج الحمام بتاع جبران المسيحى قلتله: أنا ساكن فى بيت قدامه بالظبط الدور التانى قالى : يبقى إنت إبن الشيخ عبد الحفيظ المدرس 
قولتله : أيوه قالى : إزاى أبوك وافق تشتغل الشغلانه دى قولتله: مايعرفش والنبى إوعى تقوله بعدها بقينا إصحاب ولما إنتهى خط الزرع  رجعنا نبدأ خط زراعة تانى وطبعا فرغنا "اللطع " بحفرة قدام الخولى وفى الخط التالت مريت على سجرة " خيار" وكان صغير وشكل الخيار جميل قطعت خيارتين بسرعة وحطيتهم "  بعبى " شافنى " منخر " قالى خد طماطم كمان عشان ناكلها بالغدا شفت سجرة " طماطم" قطعت منها أربع طماطمات صغيرة وطبعا لما لقيت "لطع" تانية حطيتها بعيدة شوية " بعبى " ناحية جنبى اليمين وفضلنا رايحين جايين لغاية الساعة إتنين "بالضهر" عرفتها من الخولى اللى نده علينا وقالنا الساعة دلوقتى إتنين راحة نص ساعة عشان الغدا وطبعا "محمود" أخويا قالى : حناكل إيه ؟  قولتله : طماطم وخيار وجبنة وعيش قالى" محمود" :  منين ؟ رحت مفضى " عبى "  طماطم وخيار ورحت مطلع من جيبى لفة فيها عيش وجبنة قديمة( بمش) قالى : جبتهم منين ؟ قولتله : الطماطم والخيار قالى : لأه مانا عارف شوفتك وجيبت زيك وطلع من "عبه " طماطم وخيار قدى مرتين قولتله :  يانهار إسود دالو الخولى شافك حايسجنك قالى: دانا كلت قدهم كمان قولتله : يعنى شبعان آكل لوحدى بقى قالى : لأه إنت عارفنى  باحب الأكل قولتله : "الجبنة القديمة الحدقة والمش" جيبتهم من "الزلعة"  ( البلاصى)  اللى بالسطوح قالى :  والعيش ؟ قلتله كان تحت السرير مانت عارف بابا بيخبى العيش "الناشف المفقع" تحت السرير جبت رغيفين قعدت ومحمود أخويا ولقينا المفتش " منخر " وصاحبنا " مصطفى " قعدوا معانا وكلنا ويا بعض وكانت أحلى جبنة وأطعم طماطم وأشهى خيار دقته بحياتى كان ريحة الخيار لما تقطعها تشم ليها ريحة جميلة من بعيد لسة طازة مافيش كيماوى وشربنا مية من الزير اللى جنبنا بالكوز وقام الخولى قال: يالا ياولاد عالشغل وفضلنا حتى المغرب على دى  الحال وقبل المغرب بربع ساعة ولعوا حطب بالحفرة حتى "اللطع" بتاعت الدودة ماكانش فيه رش مبيدات لسة كان "اللم يدوى"  وحرقنا "اللطع" البيض بتاع دودة القطن ووقفنا طابور والخولى قعد على ترابيزة مهكعة وكرسى مكسور بتلات رجول وقدامه دفتر ينادى الإسم يروح يمضى وياخد فلوسه ولما نده عليا رحت مضيت إسمى وخدت الفلوس عدتها لقيتها "ستة صاغ" فرحت لأن دى أول فلوس تدخل جيبى بعرق جبينى وبالحلال ونده على "محمود أخويا " راح مضى بإسمه وخد الفلوس وهوه فرحان أكتر منى قولتله : "يامحمود" لازم نشترى درة وفول وقمح للحمام قال : حمام إيه ياعم أنا "حاحوش الفلوس" لمولد النبى عشان "المراجيح والترمس والتياترو وسيرك الحلو" عشان أشوف الأسد قولتله : دا لسه بدرى قوى عالمولد يالا هات أربع قروش منك وأربع قروش منى نشترى أكل الحمام وخلى قرشين حوشهم وخدنا التمن قروش إشترينا " قدح درة ونص قدح فول ونص قدح قمح  " وروحنا للحمام بسرعة والدنيا ضلمه ومعانا لمبة جاز منورة وحطيناله الدرة والفول والقمع  تصدقوا لو قولتلكوا الحمام كان فرحان أكتر مننا وكان بياكل على لمبة الجاز وفضلنا نتفرج عليه ونسينا تعبنا طول اليوم بالشمس .
وإلى اللقاء مع "حكايات عمو فاروق بن النيل " الجزء الثانى" الحقيقية من الواقع القصة القادمة إن شاء الله تعالى
الجزء الثانى " فيضان النيل"  

abuiyad

هناك 38 تعليقًا:

دندنة قيثارة الوجد يقول...

والله يا عمو فاروق لنب النيل .. حكاية جميلة اوي وكلها مشاعر برئية وخير وبركة

بس أول مرة أعرف إن الدودة عندكم اسمها لطعة .. بس كانت أحلى لطعة في ذكريات الطفولة الجميلة .. تحياتي لك

فاروق سحير ( فاروق بن النيل ) يقول...

دندنة ياقيثارة الوجد ياشقية
بسرعة كدة تكونى دايما لكى السبق فى التعليق أنا فعلا عندى حكايات غريبة كتيرة وكنت فاكر حاقدر أحكى عدد كبير منها بقصة واحدة لكن ماقدرتش عشان أوصل التفاصيل للناس وعلى فكره الحكايات دلوقتى بقى محتاجها الكبير أكتر من الصغير ولاإيه رأيك ؟
كلمة " لطعة" معناها إن دودة القطن بتروح وهيه أخطرمرحلة لأنها بتاكل بشراهة ورق القطن وبالتالى الزرعة تموت ويبوظ القطن الأبيض وبعدين تصوم وتتشرنق " يعنى تلف حوالينها شرنقة بيضاوية وتدخل جواها بعدين تتحول لفراشة وتخرم الشرنقة وتخرج تطير وهيه تقف على ورقة القطن وطبعا بيتزاوج الذكر مع الأنثى ثم تضع بيضها على أسفل الورقة بعيداعن الشمس وتغطيها بطبقة لزجة وخيوط لتحميها من السقوط بفعل الرياح وهذه تسمى " لطعة" لأن الفراشة تلطعهاعلىالورقة يعنى تطبعها وبالليل يشعلوا الحطب فينجذب الفراش للنار ويحترق وهذا أيضا يفعله الفلاح بنفسه ليساعدعلى مقاومة الدودة .
وشكرا جزيلا لك أنك كنت الأولى إحكيها بقى لولادك أو إخواتك أو ولاد أختك والكبار حايحبوها أكتر من الصغار.

داليـ ـ ـ ـ ـ ـ ــــا يقول...

هههههههههههههههه

تجنن وربنا ايه الشقاؤه دى كلها

بس عايزه اعرف الشيخ عبد الحفيظ فقس الملعوب ولا لاءه

والله قصه جميله ياعموووو

جنّي يقول...

السلام عليكم

ما شاء الله يا عم الحاج ذكريات جميلة وزمن اجمل .. النهاردة الارض ضاعت والمبيدات المسرطنة بدل المكافحة اليدوية .. والقطن لا بقي طويل التيلة ولا قصير التيلة ..

قرأت موضوع انا وجني ولا لسه ..
بالراحة علينا يا حاج فاروق في الرد احنا مش قدك ..

تحيتي

فاروق سحير ( فاروق بن النيل ) يقول...

داليا العزيزة ...
هية قصة حقيقية وماتتنسيش عشان حاجات
موش موجودة بالحلاوة بتاعت زمان الخيار والله ريحته موش عارف أوصفهالك إزاى
طبعا فقس عم الشيخ عبد الحفيظ هوه برضه أنا اللى شقى يابنت ياشقية عرفتى منين عم الشيخ دى أصل ماما(وعلى فكرة كنا بنقول ماما وبابا ) كانت بترد على بابا تقوله حاضر ياعم الشيخ جايه أهه وكانت ماما مدرسة فرنساوى ولكن باباخلاها تقعد فى البيت وكانت جميلة ولها صورةبالضبط زى أميرات الملك فاروق وفقس عم الشيخ الموضوع بع أسبوع وماعرفناش نروح تانى حلف علينا
يبيتنا فى الشارع لو ماسيبناش الشغلانة دية وسيبناها وبقينا نتصرف بأكل الحمام بعدين حاقولك إزاى

فاروق سحير ( فاروق بن النيل ) يقول...

أخى الأستاذ الفاضل جنى ...
ليه ياراجل دعوتك لتعلق على قصيدة " قدساه لاتنتظرينى " عشان أبرد نارك من الدعاء الجميل" دعاء الرسول محمد صلى اللى عليه وسلم فى الطائف قبل رحلة الإسراء والمعراج مباشرة واللى بدأت بيه موضوع المسجد الأقصى .
والله ياصديقى كانت كل حاجة طبيعية ومغذية حتى الرش بالمبيدات بالماكينة اليدوية أو الطائرات للقطن لم يكن قد عرف بعدصحيح عرف بعدفترة قصيرة لاتتعدى سنة لكن ماتنساس إن الرش كان بيأثر على الزراعات التانية الغذائية
ياعم موضوع الجنى ده حاصلى شخصيا وموش حاجة خيالية حاتسمعة بقصة من قصصى
لأنى بأحكى بتسلسل زمنى تقريبا عشان تبقى القصص مرتبة يمكن أكتبها بكتاب بعض القراء الذى أعتز بشخصيتهم همه اللى شجعونى على سرد القصص وكتابة الأشعار بكتاب ربنا يسهل وشرفتنى والله

مي يقول...

روووووووووووووووعة بجد لتفاصيل شدتنى اوى والالفاظ حية
وازاى اتغلبت على صعوبة فى محكاة الالفاظ كانها بتتقال دلوقتى وبالعامية دى
اسلوب رررررائع
احييك على ابداعك

فاروق سحير ( فاروق بن النيل ) يقول...

مى ...
أهلا بيكى وشرفتى الحكاية لما تقوليها كما حدثت بالضبط دون تزييف وحتى بإيجابياتها وسلبياتها وأخطائها بتكون طبيعية وتدخل القلب على طول وتصل للمشاعر بسرعة وهوه ده أصل القصة وعلى فكرة باحاول إن قصصى الحقيقية وحكاياتى أقولها بتسلسلها الزمنى وربنا مايجيب الزهايمر لنا دلوقتى لحد ماخلصها كلها الفضل يرجع لأصدقائى العديدين الذى أعتز بهم إبتداءا من الأستاذ سيد(صاحب مدونة Sal ) هوه اللى شجعنى وكثيرون مثل دندنة قيثارة الوجد - تييرز - فشكوول - داليا - جنى - فضفضة - إيناس الملاك الحزين - شوية فضفضة - منى .. Ms Venus وآخرين

shimaa elkholy يقول...

جميييييييييييييله

بجد حلوه اوي

اولا انا باحب الحواديت جدا جدا

باحب الحواديت القديمه جدا جدا

احلى حاجه بجد فى قصة حضرتك هى قيمة العمل
ان الواحد يتعلم يشتغل ويكسب فلوس

مش يقل ادبه على ابوه وياخد فلوس


وعلى فكره انا كنت عامله بوست اسمه هارجع عمالة الاطفال من تاني

تحياتي لحضرتك

واتشرفت بزيارتك ومعرفةمدونتك يا فندم



حضرتك تبقى تشيل الكلمه التاكيديه من التعليقات اصل بتبقى ممله

فاروق سحير ( فاروق بن النيل ) يقول...

ندى الياسمين ...
أهلا بيكى وإن شاء الله حتكونى زبونتى المفضلة بالحكايات وماكنتش عارف إن فيه كلمة مؤكدة على التعليق حاشيلها دلوقتى حالا وشكرا لك

دندنة قيثارة الوجد يقول...

مش راح أبطل شقاوة .. ومرسي أوي يا عمو على التفاصيل دي ربنا يكرمك

فاروق سحير ( فاروق بن النيل ) يقول...

دندنة قيثارة الوجد ..
سعيد جدا بردكمرة أخرى هذا دليل التفاعل مع الموضوع ودقتك وإصرارك على تكملة مابدأتيه وهذا من سمات الشخصية القوية المنظمة المرتبة ربنا يميكى من شر كل حاسد إذا حسد ودومتى

جنّي يقول...

مرحبا استاذ فاروق

على فكرة انا لم اسجل في اي مدونة اخرى وكما قلت لعدم معرفتي وليس لرفضي فمن يسجل عندي يطمع في تسجيلي عنده وهذا من حقه ..

وقد حاولت ولكن الصدفة قادتني لشئ وجدته عندك فعندما قمت بفتح التسجيل الخاص بك وجدت عنوان : ! My Blog
وهو لينك موقع جامع لكل المواقع الاباحية كما وجدته في الوضع الكامل الخاص بك في المدونات التي تتابعها .. ارجو سرعة حذفه حتى لا تقع تحت طائلة الآية :
{إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالآخِرَةِ وَاللَّهُ يَعْلَمُ وَأَنتُمْ لا تَعْلَمُونَ }النور19

او تقع تحت طائلة الحديث الشريف :
عن سالم بن عبد الله قال سمعت أبا هريرة يقول: سمعت رسول الله صلى الله عليه وسلم يقول كل أمتي معافى إلا المجاهرين .. صحيح البخاري ومسلم

واعرف مقدما انه وضع بالخطأ وأربأ بك من قصد وضعه ..

تحيتي

فاروق سحير ( فاروق بن النيل ) يقول...

الأخ سعيد ...
هل تعلم أن كل الأصدقاء تدخل عليهم هذه المواقع الإباحية عن طريق جوجل رغما عنك لأنى أراها فى كل مدونة صديق ولم أراها عندى وشكرا لك على تنبيهى وسأقوم بحذفها فورا فلم أراها من قبل
وشكرا لك

فاروق سحير ( فاروق بن النيل ) يقول...

الأستاذ سعيد ...
مرة أخرى حاولت أن أبحث عن ماذكرته من وجود موقع إباحى هو " My blog"
ولم أجده فأرجوك قولى أين هو بالضبط لأنى لم أجده فى أى مدونة من المدونات الثلاثة ولا مع أعضاء كل منها

راء يقول...

:)

برافو عليك من كل قلبي
عجبتني اوي الحكاية
زمان كان كل حاجة ليها طعم مختلف

كنت هسأل باباكوا عرف ولا لأ بس قريت م التعليقات اللي حصل ^_^
منتهى البراءة ف الموضوع..وان شاء الله متابعه حكاياتك وبتاعت فيضان النيل ديه عشان اعرف ايه اللي حصل

كلمات من نور يقول...

سبحان الله العمل بإيد الواحد بيكون له طعم احلى خاصة في السن داه ....عمي ربي يطول عمره كان عامل غية حمام عالسطوح وكان حبي اني ازوره واطلع معاه اشوف الحمام و أكله و اراقب الأم وهي حاضنه صغارهاو أحلى منظر لسه عالق بذهني لما كان يبدأ يشاور بالعلم الملون علشان يلمهم قبل المغرب ويقفل وننزل .....صحيح الذكريات كنز ......في انتظار باقي الحكاية بفارغ الصبر (:

كلمات من نور يقول...

http://tanzil.info

هدية لحضرتك :
سورة يوسف
بِسْمِ اللَّـهِ الرَّحْمَـٰنِ الرَّحِيمِ
الر ۚ تِلْكَ آيَاتُ الْكِتَابِ الْمُبِينِ ﴿١﴾ إِنَّا أَنزَلْنَاهُ قُرْآنًا عَرَبِيًّا لَّعَلَّكُمْ تَعْقِلُونَ ﴿٢﴾ نَحْنُ نَقُصُّ عَلَيْكَ أَحْسَنَ الْقَصَصِ بِمَا أَوْحَيْنَا إِلَيْكَ هَـٰذَا الْقُرْآنَ وَإِن كُنتَ مِن قَبْلِهِ لَمِنَ الْغَافِلِينَ ﴿٣﴾ إِذْ قَالَ يُوسُفُ لِأَبِيهِ يَا أَبَتِ إِنِّي رَأَيْتُ أَحَدَ عَشَرَ كَوْكَبًا وَالشَّمْسَ وَالْقَمَرَ رَأَيْتُهُمْ لِي سَاجِدِينَ ﴿٤﴾

فاروق سحير ( فاروق بن النيل ) يقول...

طالبة مقهورة درجة أولى ...
أهلا بيكى وفعلا حكايات لها معنى كبير والحقيقة هوه عرف بعد أسبوع وإضطرينا نبيع الحمام وندبح الصغيرين وبرضه بعد حوالى سنة ونص جالنا جوزين هدية من خالى رحمه الله من بورسعيد بس بعد أسبوع عملنا فيها أبو العريف وأطلقناهم على أمل يعودوا للمكان وفص ملح وداب بعد عدة أشهر زورنا خالنا نصيف عنده وقولناله عليهم قالنا مادام ماحافظتوش عليهم تبقى تستاهلو وإنسوا وفوجئنا بوجودهم عنده سافروا إزاى وطارو وعرفوا الطريق موش عارف

فاروق سحير ( فاروق بن النيل ) يقول...

كلمات من نور ...
أهلا بيكى بمدونتى وأهلا بأهل الإسكندرية
وأهلا باليود وعروس البحر الأبيض المتوسط ومدينة الإسكندر الأكبر ...
أولا شكرا على تفاعلك مع الأولاد الصغار فاروق ومحمود ولو رجع بينا الزمان حافرجك على الحمام
ثانيا: المفاجأة الثانية هى إن الولد فاروق كبر وبقى عمو فاروق وبيربى حمام دلوقتى وبياكل منه كل شهر وعنده جوز بنى على أبيض بعد أسبوع ياكلهم بالفريك مع ولاده ( فيه جوز تانيين بالفريز من أسبوع )
ثالثا : جزاك الله كل خير على سورة يوسف التى أحبها وهى فعلا أحسن القصص كما قال الله تعالى وإتخذتها مقدمة وتحية لزوارى الأعزاء وشكرا لك

رشيد أمديون يقول...

ودائما أقرا لك يا ابن النيل الأصيل

ذكرياتك الطفولية جميلة إني وأنا أقرأ أتخيل المشاهد وارسمها كما أشاهدها في الأفلام السنيمائية، غير أن اسأل أين كانت ولادتك في أي منطقة من الصعيد؟

ملاحظة
------
من فضلك صحح كلمة إثناعشر لقد سقطت سهوا
"سنة 1959 وأنا سنى إتناشر سنة "

فاروق سحير ( فاروق بن النيل ) يقول...

أبو حسام الدين ...
أنا لم أولد بالصعيد ولدت بمحافظة المنوفية وسط الدلتا بمدينة منوف سنة ألف وتسعمائة وسبع وأربعون ميلادية
أما كلمة "وأنا سنى إتناشر " لم تسقط سهوا بل متعمدة فهذه ياأخى لغتنا العامية الدارجة فلو لاحظت أنى كتبتها بالعامية لأن القراء المصريين معظمهم يضجرون بالقصص التى تحكى باللغة العربية ومع ذلك ستلاحظ أن الجزء الثانى" فيضان النيل" مكتوب باللغة العربية الفصحى وأشكر ملاحظتك هى صحيحة ولكن ليست فى موضعها وإلا سأضطر إلى كتابتها كلها باللغة العربية الفصحى فلا تؤاخذنى فى ذلك أنت عندك حق وأنا كذلك وشكرا لك تواجدك الذى يسعدنى دائما

رشيد أمديون يقول...

أستاذ فاروق

أعتذر على الملاحظة التي لم تاتي في محلها، وكما تقولون بالعامية "فتتني دي"...شكرا لك

فاروق سحير ( فاروق بن النيل ) يقول...

أبو حسام الدين ...
لماذا تعتذر ياصديقى أنت على حق والله لو كان بيدى كنت كتبت باللغة العربية الفصحى ولكن القصص متوقع يقرأها أولادنا الصغار وهم يحبون ويفهمون العامية بسرعة والعربية الفصحى صعبة عليهم لذا معظم القصص ستكون بالعامية وبين الفينة والفينة قصة باللغة العربية وشكرا على ملاحظتك القيمة التى تدل على أنك لماح شرفت ياصديقى ...

رشيد أمديون يقول...

السلام عليكم
دائما أعود...

أظن أنك لم تذخل مدونتي الثاني همسات الروح والخاطر بحيث هي فيها الجديد ها هو الرابط:
http://hams-rroh.blogspot.com/2010/05/blog-post_24.html

وشكرا

فاروق سحير ( فاروق بن النيل ) يقول...

أبو حسام الدين ....
لقد دخلت المدونة وعلقت بها إلا إذا كنت تقصد مدونة أخرى عموما سأتبع الرابط وشكرا لك

فضفضه يقول...

السلام عليكم
اولا حكايتك فى منتهى الروعه وحاسه بيك انت واخوك وقت خروجكم من البيت وفرحتكم بالشغل والاعتماد على النفس وفرحتك بحصولكم على اول اجر من عرق جبينكم
برافوا عليكم
وعسل اوى اخوك ال بيحب الاكل ده
بالنسبه للدوده زمااااااااان اخويا كان بيشترى دود وبتعمل شرنقه بس انا كنت جبانه اوى ولما كانت بتزحف بره المكان بتاعها كنت اخاف ادخل الاوده ال هيا موجوده فيها وكانت هوايه بين العيال فى سن الاعداديه
لدرجة اخويا كان بيربى كتير وباع لاصحابه
وكسب مبلغ حلو اشترى منه حذاء رياضى جميل وكانت فتره بالنسبه له حلوه
عجبتنى حكاياتك وهكمل الباقى باذن الله
تسلم ايدك

فاروق سحير ( فاروق بن النيل ) يقول...

فضفضة ........
إنت إتأخرتى كتير على الحكايات إحنا الآن فى ثورة عارمة على الذل والقهر اللى مالوش حدود من بره ومن جوه موش لازم نسكت بقى لاوم على الأقل نتكلم بصوت عالى ونلعن سلسفيل جدودهم وأحفادهم وأولادهم ولا إيه .
ياإما يكونوا عندهم كرامة ويسحبوا السفير ةتكون فلسطين ومصر أرض واحدة رغم أنف إسرائيل يعنى لاحدود فكده تبان إسرائيل على حقيقتها هية عايزة إيه بالضبط أمام العالم ياإما كل الحكام يروحوا ويغوروا وييجى اللى عنده كرامة وشجاعة ونخوة

فضفضه يقول...

اتمنى كل الحكام يروحوا يغوارو فى ستين داهيه
ويجي ال عنده شجاعه ونخوه وضمير اتمنى قواد ورؤساء رجاله بجد
هنعمل ايه بس يااستاذى العزيز
مش بأيدنى شىء حسبى الله ونعم الوكيل مليون مره
انا خايفه من ال جاى ربنا يستر

فاروق سحير ( فاروق بن النيل ) يقول...

فضفضة ........
شكرا لك ردك والحقيقة الواحد حزين وحاتجنن موش أعرف إيه

وداد يقول...

الله يا خالو

قصة جميلة جدا

بجد وصفك للحكاية رائع جدا وتخيلت خالو محمود وانت معاه

الله ما يحرمنا منك ولا من قصصك الجميلة

وانا بقول انا طالعه لمين بحب سورة يوسف

طلعت زيك يا خالو بحب سورة يوسف جدا

الله يرحمها تيتا انا كنت اسمع انها فعلا طيبة

وجدو اعرف كمان انه كان شديد

متابعة كل تدويناتك هنا

انا عارفة ان تعليقي متأخر لكن انت لسه معرفني النهاردة لما كنت بتعيد علينا في المنوفية انك عندك مدونتين جداد

هروح أقرأ باقي قصصك الجميلة

وربنا يرحم جدو وتيتا

ويطول لنا بعمرك يا خالو

فاروق سحير ( فاروق بن النيل ) يقول...

وداد
شكرا جزيلا على تشريفك وكلامك الطيب وإطراءك تالجميل وأنا آسف على التأخير بالردلأنى كنت قبل ذلك عامل قيود على نشر التعليق قبل الإطلاع عليه حتى أعرف التعليقات الجديدة وبعد توجيهك بالمرة السابقة بأن أترك التعليق مفتوح تركته فتأخرت على الرد لعدم ملاحظتى لعدد التعليقات والتعليق الجديد إنتى السبب شكرا لك حبيبتى .
خالو /فاروق

tote soly يقول...

قصة جميله يا خالوا والأجمل انكو فكرتو تشتغلوا علشان تجيبو اكل للحمام
تعرف يا خالو انا زمان قوي وانا في 5 ابتدائي رحت عند عمي مره في الغيط وشفت الخولى والطفال معاه وقفين على راس الغيط وبينظمهم علشان ينزلو يلموا الدودة وكان نفسي قوي انزل معاهم ورحت البيت والموضوع معلق في دماغي قوي وقررت اني لازم اروح معاهم واعمل زيهم وانا كنت بحب اروح الغيط عند عمي ومره اتفقت انا وبنت عمي اننا روح الدودة كان دا اسمها عندنا رحنا كلمنا وحده صحبتنا وراحت قالت للخولى وقال لها خليهم يجو يسجلو اسمهم ورحنا وماما كانت رفضه تماما وتقلى ابدا مش هتروحي هو انتي نقصك حاجه لو ابوك عرف هيدبحك رحت ريحه قيلاله والعجيب انه وافق وقال لها سبيها تروح وفرحت قوي وماما ما زالت رفضه
واتفقت مع بنت عمي اننا روح الصبح وفضلت قلقانه طول الليل ودي عادتي لما اكون مسافره او وريحه مشوار الصبح ... لحد ما النهار طلع ولبست بسرعه ونزلت ندهت لبنت عمي وقالت لى مجبتيش اكل معاكي قلتلها انا نزلت بسرعه قبل ما امي تصحى قالت لى مش مهم انا هجبلك معايا وجابت عيش وجبنه حدقه وطماطم ورحنا الغيط مع الانفار ووزعنا الخولى كل وحده في خط وقال لنا زي ما الولقو بالظبط ولى هتسيب وراها لطعه هيتخصم منها نص يوم ومشيت في الخط اقلب الورق يمين وشمال لحد ربع الخط لقيت لطعه بقيت فرحانه وندهت على الواد اللى كان ماشي وريا وسألته هيه دي الطعة قالى قويه وبعدها بشويه نده عليا وقالى انا لقيت لطعه وراكي بس مش هقول للخولى علشان انتي لسه جديده وباين عليكي مش وش شغل وبنت ناس وكنت رايحه بلبس خروج والكل كان بيبصلى ويتريق عليا ويقولو هيه راحه تتفسح ولا راحه تشتغل المهم جيت لحد نص الخط ومقدرتش اكمل وكنت خلاص هموت من الحر وتعبت جدا وعايزه اشرب قلت لبنت عمي انا تعبت وعايزه اروح قالت لى وانا كمان بس هنروح ازاي قلتلها معرفش قالت لى لو الخولى شفنا هيضربنا المهم جه وقت الغدا وطلعنا قلتلها انا مش هنزل تاني يلا نمشي وجرينا وسط الارض وغيط يشلنا وغيط يحطنا لحد ما شفنا العشه بتاعت عمي ورحنا استخبنا فيه لحد العصر ومن حسن حظنا ان عمي مكنش هناك ولما جعنا لقينا سبت متعلق في خشبه في اعلى العيشه نزلناه لقينا فيه عيش ناشف وجبنه حدقه فضلنا ناكل لما خلصناه وبعدين طلعنا شربنا من الطرمبه وروحنا وماما شافت منظري اتخدت وقالتلى اياكي تروحي تاني وفي اخر الاسبوع عرفت انهم راحو يقبضو قلت لبنت عمي تعالى نقبض قالت لى مش هيردنا سألنا واحده كانت معانا قالت ممكن يديكو نص يوم وكان ايامها اليوم بنص جنيه رحنا عند الخولى في بيته ولما عرفنا وعرف احنا ولاد مين ضحك وقال علشان خاطر الحج محمد ( والدي رحمة الله عليه ) ادنا اليوم كامل وروحنا فرحانين يااااااه رجعتي 22سنة يا خالو وفكرتنى بايام جميله وانا بقرأ قصتك
معذراً على طول ردي

فاروق سحير ( فاروق بن النيل ) يقول...

tote soly
أحييكى على أسلوبك بسرد القصة حاولى تكتبى بمدونتك قصص للأطفال تشبه ماقولتيه بالتعليق كويسة جدا

❤ soso ❤ يقول...

حكايا حلوة فيها براءة الطفولة ومشاعر دافئة مفعمة براحة الحقول

لك مني اجمل تحية

وبنتظار تشريفك لمدونتي المتواضعه

سارا العمري

فاروق سحير ( فاروق بن النيل ) يقول...

سارة العمرى( مدونة قلب العرب)...
أهلا بيكى وشرفتينى بمدونتى ....
لم أعرف لم إخترتى أول قصة من حكاياتى وتجاربى وهى ( دودة القطن بستة صاغ) وعادة الكاتب أول عمل له بيكون فيه أخطاء أو نقوص وعيوب بيتداركها فى الأعمال القادمة الثانية ثم الثالثة ثم الرابعة ثم الخامسة عموما مرحبا بكى وسأعلم من شخصيتك ومدونتك أسباب ذل لأنه يهمنى جدا معرفة مع من أتعامل وشكرا لكى وسأزور مدونتك فورا

شلة لايكثر يقول...

تقبلي مروري سعيدهبتجولي بمدونتك اختك ....ايمي

فاروق سحير ( فاروق بن النيل ) يقول...

شلة لايكثر.........
مرحبا بيكى زادنى شرف ورفعة وسعادة وفخر بمرورك وأهلا بيكى

المتابعون

من أنا

صورتي
رجل عصامى:مسروق أحلامه بالمعاش مر بمواقف صعبة وخرج منها بتجارب وخبرات من جميع الأصناف صقلته بدأ فقيرا وبمداومته على صلة الرحم أغناه الله , متواضع , عصبى , حاد المزاج مع الحق , غير دبلوماسى , محب للجميع , إجتماعى , رومانسى , متدين .